Alahady 18 Oktobra 2020
Andriamanitra ô, Andriamanitro Ianao ; mitady Anao fatratra aho ; mangetaheta Anao ny fanahiko, maniry Anao ny nofoko, eto amin’ny tany maina sy mangentana tsy misy rano. Salamo 63:1
Ny Tompo nitsangana teo anilako ka nampahery ahy. 2 Timoty 4:17
Auguste Glardon, misionera tany India efa zato taona mahery lasa izay, dia tsy maintsy niaritra fitsapana mamaivay : tazo mahery vokatr’ireo aretin’ny tany mafana, tebiteby noho ireo bibidia, nandritra ireo diany fitoriany ny Filazantsara… ary tatỳ aoriana, ny alahelo noho ny nahafatesan’ny zanany lahy kely 5 taona.
Ao amina tononkira iray mitondra ny lohateny hoe : “Mangetaheta ny fanatrehanao aho”, dia miantsoantso an’Andriamanitra izy, manoloana ny tsy fananany hery, ary milaza ny fangirifiriany, nefa ihany koa ny finoany an’io Andriamanitra akaiky antsika olombelona io :
Mangetaheta ny fanatrehanao aho,
Ry Andriamanitra Tompon’ny finoako.
Ao anatin’ny fahalemeko fatratra,
Inona no ho nataoko raha tsy teo Ianao ?
Isanandro, isanora,
Endre ! mila Anao aho,
Avia, Jesosy, tomoera
Akaikiko kokoa hatrany.
Mandritra ireo andron’oram-baratra,
Maizimpito, mampangorohoro,
Raha mihena ny herim-poko,
Inona no ho nataoko raha tsy teo Ianao ?
Jesosy ô, ny fanatrehanao,
No fiainana sy fiadanana,
Fiadanana ao anaty fijaliana
Ary fiainana ho mandrakizay.