Asabotsy 15 Mey 2021
Raiko ô, efa nanota tamin’ny lanitra sy teo anatrehanao aho, ka tsy mendrika hatao hoe zanakao intsony ; fa ataovy tahaka ny anankiray amin’ny olona karamainao aho. Lioka 15:18, 19
Fa ity zanako ity efa maty, fa velona indray, ary efa very, fa hita indray. Lioka 15:24
Rehefa nivoaka ilay trano fisotroana izy telo lahy, dia nidera an’i Horace ireto namany. Iny hisaraka samy handeha hody iny izy ireo, no nanatona ilay lehilahy matanjaka ka nanontany hoe :
— Mba afaka mihaona anao ve aho rahampitso ?
Nisalasala i Horace.
— Eny, fa momba ny inona moa ?
— Nanetsi-po ahy ny toriteninao. Tiako ny hiresaka aminao ny amin’izany. Matoky anao aho.
Sady nanasa azy ho any an-tranony i Horace no nanantena fa ho hadinony izany.
Nefa dia indro tokoa izy ny ampitso. Nampandroso azy i Horace :
— Inona no tianao holazaina amiko ?
— Tantara mampalahelo : tafalentika ao anaty trosabe izahay mivady. Tsy mitsahatra ny mifamaly izahay, ary avy eo dia tonga ny toaka, ny fahantrana… Kivy izy, ary nangataka hoe :
— Miangavy anao aho, mba mivavaha ho ahy izao !
Fahatairana toa inona moa ny an’i Horace ! Tokony hibaboka ny fitaka nataony ve izy ? Dia hamoy fo ilay lehilahy. Nakambany ny tanany ary niambakavaka izy nanonona teny vitsivitsy ara-pivavahana. Nisaotra azy ilay mpitsidika ary nanontany raha afaka miverina. Nanaiky i Horace. Saingy aiza ao amin’ny Baiboly no hahitana teny fampaherezana ? Tsy izy mihitsy aza ve no mila izany ? Niha tsy nahazo aina kokoa hatrany izy, noho izao toejavatra izao. Aiza no hahitana fanampiana ? Any amin’ilay mpiara-monina aminy angamba ?
Nandray azy tam-pifaliana io mpino io. Nanjary mpitsidika azy matetika i Horace sy ilay lehilahy, ka teny am-pamakiana ny Baiboly teny izy ireo dia nanaiky hamaly ny fitiavan’Andriamanitra, Andriamanitra Izay nitady azy. Tsy ela izy ireo dia niaiky ny lasany fadiranovana sy meloka ary nandray ny famelan-keloka avy amin’Andriamanitra. Azon’izy ireo ny fiadanam-po sy fahasambarana avy amin’ny fanatrehan’Andriamanitra.