Alahady 20 Jona 2021
Lehibe ny zava-miafina ny amin’ny toe-panahy araka an’Andriamanitra, dia Ilay (Jesosy) naseho teo amin’ny nofo. 1 Timoty 3:16
Nirahin’Andriamanitra ny Zanany, nateraky ny vehivavy. Galatiana 4:4
Izy (ireo magy) nahita ny Zazakely sy Maria reniny ka niankohoka teo anatrehany. Matio 2:11
Teraka tany Betlehema Jesosy Ankizy kely. Nisy magy avy tany atsinanana, nahafantatra tamin’ny alalan’ny kintana ny nahaterahany, tonga hitsaoka Ilay ho mpanjakan’ny Jiosy. Nahare ny aminy anefa i Heroda mpanjaka. Feno fialonana izy, ka nikasa hamono Azy. Koa nomen’Andriamanitra toromarika i Josefa, mba hanafina Ilay Ankizy kely (adika, ao amin’ny Baiboly, hoe : Zazakely) sy ny reniny. Averimberina tsindrina io fiteny mampihetsi-po io, miverina inefatra, ao anatin’io toko io ihany. Izany dia manindry fa mila ny reniny ny ankizy kely, ary tsy sitrak’Andriamanitra ny hampisarahana azy ireo. Miankina tanteraka amin-dreniny tokoa mantsy izy, amin’izay rehetra ilainy. Ny reniny no mamelona sy mikarakara azy am-pitiavana. Asehon’ny Salamo 22 antsika mialoha ny fihetsehampon’io Zaza vao teraka io, rehefa minono amin-dreniny. Niteny tamin’Andriamanitra Izy hoe : „Ianao no nampivoaka ahy avy tao an-kibo ; nampandry ahy feizay Ianao, fony aho mbola nampinonoin’ny reniko” (Salamo 22:9).
Nefa io Ankizy kely nanetry tena io, nateraky ny vehivavy tahaka antsika rehetra, dia Ilay „Zanaky ny Avo Indrindra”, Ilay „Zanak’Andriamanitra” ihany koa (Lioka 1:32, 35). Io Zaza menavava marefo io dia tsy iza fa Ilay Mpahary izao tontolo rehetra izao. Ary na dia nampandriana tao anaty tavy fanisiana sakafom-biby (adika, ao amin’ny Baiboly, hoe : fihinanam-bilona) aza Izy, dia Izy koa no mifehy ny fihetsehan’ny kintana sy ny vahindanitra, ary „mihazona ny zavatra rehetra amin’ny herin’ny teniny” (Hebreo 1:3). Izy no nahary izao rehetra izao tamin’ny fahalalany, ary ny fahefany no mampaharitra azy ireny.
Tsy manam-paharoa ny nanafoanan’Ilay Mpahary antsika ny tenany, tamin’ny nahatongavany tao anatin’ilay tavy fanisiana sakafom-biby tao Betlehema ; izany no „zava-miafina ny amin’ny toe-panahy araka an’Andriamanitra”, zava-miafina lehibe tokoa !