Talata 28 Marsa 2023
(Hoy Andriamanitra :) Raha tsy mbola miantso aza izy, dia hamaly Aho ; ary raha mbola miteny izy, dia hihaino Aho. Isaia 65:24
Fa Ahy izao tontolo izao sy izay rehetra eo aminy. Salamo 50:12
Tamin’ny lohataona 1875, Hudson Taylor, ilay mpanorina ny Misiona kristiana any Chine, dia nijoro teo amin’ny fiantsonan-dalamby tao Brighton, niandry ny lamasinina hiverenany any Londra. Nanatona azy ny printsy rosiana iray, ny andriandahy Bobrinsky. Nandre azy nitoriteny vao tsy ela izy io, ary nanoso-kevitra mba hiara-dia aminy.
— Ka any amin’ny sokajy fahatelo anie no misy ahy e, hoy ilay misionera.
— Ny tapakilako dia manome lalana ahy ho any koa, hoy ny navaliny.
Irery izy ireo tao amin’ny efitrakeliny, ary avy hatrany dia namoaka ny poketrany ilay andriandahy ary niteny hoe :
— Mamelà ahy mba hanome anao zavatra ho an’ny asanao any Chine.
Nony nanopy maso ilay taratasim-bola natolotra azy i Taylor, dia nihevitra fa nisy hadisoana : vola be mantsy no voasoratra teo.
— Nihevitra hanome ahy 5 livatra angamba ianao ? hoy izy ; aoka haveriko aminao ity taratasim-bola ity, satria 50 livatra no voasoratra eo.
— Tsy afaka handray an’iny intsony aho, hoy ilay mpanome, namaly, zendana toa an’i Taylor. 5 livatra tokoa no saika nomeko anao, nefa angamba ianao tian’Andriamanitra handray 50 ; ka tsy afaka handray an’iny intsony aho.
Lasa saina fatratra i Taylor noho io tranga io, ka nony tonga tany Londra, dia namantana tao amin’ny foiben’ny Misiona, izay nisy fotoam-bavaka indrindra, tamin’izay fotoana izay. Nisy vola tokony haloa any Chine, ary tsy ampy 49 livatra ny teo ampelatanana. Ireo nahafantatra ny toejava-nisy dia nahatsapa fa tokony hoentina am-bavaka manokana izany, ary teo am-pivavahana izy ireo, no tonga i Taylor ary nametraka ilay taratasim-bola 50 livatra teo ambony latabatra.