Zoma 11 Aogositra 2023
Fa ny lalàna dia nomena tamin’ny alalan’i Mosesy ; fa ny fahasoavana sy ny fahamarinana kosa dia tonga tamin’ny alalan’i Jesosy Kristy. Jaona 1:17
Ireto misy lohahevitra vitsivitsy ao amin’ny bokin’i Patrick Hamilton, izay nodorana velona satria tsy nanaiky hivadika amin’ny Baiboly :
Ny Lalàna dia mampiseho antsika ireo fahadisoantsika.
— Ny Filazantsara kosa manolotra antsika ny fanafana.
Ny Lalàna dia manambara amintsika ny fanamelohana.
— Ny Filazantsara kosa, ny famonjena.
Ny Lalàna dia ny tenin’ny fahatezeran’Andriamanitra.
— Ny Filazantsara kosa, ny tenin’ny fahasoavan’Andriamanitra.
Ny Lalàna dia mitondra antsika ho amin’ny famoizampo.
— Ny Filazantsara kosa manome antsika ny fahafahana.
Fifampiresahan’ny Lalàna sy ny Filazantsara :
Hoy ny Lalàna : Aloavy izay tsy maintsy efainao.
— Ny Filazantsara kosa manambara hoe : Kristy efa nanefa ho anao.
Ny Lalàna dia miampanga antsika hoe : Mpanota fadiranovana ianao, ka ho faty.
— Ny Filazantsara kosa manambara hoe : Voavela ireo fahotanao ; ho voavonjy ianao.
Ny Lalàna dia mampianatra hoe : Mila manonitra ireo fahotanao ianao.
— Ny Filazantsara kosa manambara hoe : Efa noraisin’i Kristy teo amin’ny tenany ny famaizana sahaza anao.
Hoy ny Lalàna : Mitambesatra aminao ny fahatezeran’Andriamanitra.
— Ny Filazantsara kosa mampianatra hoe : Kristy efa nampihavana anao amin’Andriamanitra, tamin’ny alalan’ny rany.
Ny Lalàna dia mitaky hoe : Aiza ny fahamarinanao, aiza ireo asa soa vitanao, aiza izay azonao aloa amin’Andriamanitra ?
— Ny Filazantsara mamaly hoe : Kristy efa nanefa ho anao, Izy no fahamarinanao sy famonjena anao, Izy no manome anao ny fiainana mandrakizay.
(tapitra)